Pantalan sa Polambato, Siyudad sa Bogo: Laing Bag-ong Ganghaan sa Kalamboan

Ni RUDY L. PESCANTE

Mga hulagway kuha ni HRMO Joy Tan sa Bogo City

KANIADTONG Abril 28, 2008, si Presidente Gloria M. Arroyo maoy nangunay sa pagsubo sa bag-ong nahuman nga pantalan sa Barangay Polambato sa Siyudad sa Bogo. Kauban niya sila si Kalihim sa Departamento sa Trasportasyon ug Komunikasyon Leandro Mendoza ug si Hepe sa Presidential Management Staff Cerge Remonde nga usa usab ka inilang magsisibya sa radyo ug telebisyon. Didto usab ang makugihong gobernador sa Sugbo, Gov. Gwen Garcia, nga kinasingkasing giabiabi ni Halangdong Mayor Junie E. Martinez sa Siyudad sa Bogo, bisan pa sa ilang panag-atbang sa politika.

Didto usab ang malaomong umaabot nga kongresista sa Kuwarto Distrito, si Kanhi Mayor Tining Martinez sa Bogo, ug si Kanhi Kongresista sa Kuwarto Distrito, Hal. Clavel Asas Martinez. Diha ang kinabag-ang katawhan gikan sa nagkalainlaing dapit nga mingsaksi sa pagsubo sa maong pantalan sa Siyudad sa Bogo.

Makugihon kaayong ming-abag nilang City Administrator Joseph Pepe Lepon ang mga opisyal sa Barangay Polambato nga gipangulohan ni Kapitan Narciso Melendres sa pag-abiabi sa mga dumuduong niadtong higayona. Didto sa ila ni Kanhi Konsehal sa Bogo Narciso Jusay Jr. motugpa ang helikopter sa presidente ug ingon man didto ipahimutang ang pangandam alang sa pagkaon sa maong higayon.

Atol sa maong unveiling ceremony sa Bogo Port sa Polambato, midunggo ang unang duha ka RO-RO (minubo sa Roll-on Roll-off) gikan sa Palompon, Leyte ug sa Masbate. Natingala na lang ang mga pasahero nga sa ilang pagkanaog gikan sa maong barko, gisugat silag lamano ni Pangulong Gloria M. Arroyo.

Sugod niadtong Mayo 8 ning tuiga, ang eskedyul sa biyahe sa barkong Super Shuttle Ferry, alas nuybe sa buntag, maoy igikan sa Bogo padulong sa Palompon, Leyte, ug mobalik sa pagka ala una sa hapon, matag adlaw. Ang ruta alang sa ubang dapit wala pa ipahibalo, apan di na kini madugay, kay sa pagsulat niini diha nay daghang kompaniya nga miduaw sa maong pantalan.

Sukad pa sa tuig 1912, may naugmad nang pantalan sa Polambato ug nahimo kining dunggoanan, bisag hunas, sa dagkong mga barko, lakip sa mga sakayang de layag, sama sa paraw (duha ang layag) ug belos (usa ray layag). Ug naglabi ang mga panagatang dagko nga de makina nga molandig, ilabi na kon magdaot ang panahon kay salipod man kini. Gani, may mga barko nga gikan sa Siyudad sa Sugbo ang mopasalipod dinhing dapita kon maatlang may bagyo ug di na mahimong mopadayon pa silas unahan. Nahimutang man god ang maong pantalan sa bahiya sa Bogo City, ug atbang gayod sa poblasyon sa siyudad, diin nahimutang ang lain sab nga pantalan nga malandigan lang sa dagkong mga sakayan kon dakong dagat.

Ang pagpahimo sa maong Pantalan sa Polambato, aron madunggoan og dagkong mga barko sama sa RO-RO, gisugdan kaniadto pa sa panahon nila ni kanhi Presidente Fidel Ramos ug Joseph Estrada apan kini nahuman sa panahon na ni Presidente Gloria M. Arroyo. Migugol kinig Php75 milyones tanan.

Matod pa ni karon Mayor Junie E. Martinez kinsa kanhi maoy nag-unang kongresista sa Kuwarto Distrito sulod sa tulo ka termino, nadugay ang pagkahuman sa maong proyekto tungod sa kalangay sa pundo. Gipun-an kini ni Presidente Arroyo og Php35 milyones, dugang sa gigahin ni Kongresista Clavel Asas Martinez nga Php25 milyones gikan sa iyang Priority Development Assistance Fund.

Nakita man god nga pabor usab kining maong pantalan sa mga taga lalawigan sa Masbate, Leyte, Samar, ug sa ubang bahin sa Negros, Bohol ug Mindanao, mao nga gipaladman ug gipadak-an pa gyod ang maong pantalan. Ug tungod usab sa pagsanong sa Executive Order No. 170 nga gilagdaan ni Presidente Arroyo niadtong tuig 2003 nga nagpasiugda sa Cenral Nautical Highway kun RORO System. Mapadali man god pinaagi sa RO-RO ang pagdala sa mga produkto gikan sa ubang dapit kay makargahan man god kini sa mga trak de pasahero ug trak de karga nga mopadayon sa pagbiyahe inigdunggo sa pantalan.

Ang Polambato Port, konektado gikan sa ubang pantalan sa RORO sama sa Bicol, Masbate, Bohol, Leyte, Cagayan de Oro City, ug ngadto na sa Isla sa Camiguin.

Kining bag-ong Pantalan sa Polambato adunay gitas-ong kapin sa kawaloag duha ka metro. Adunay tulo ka dunggoanan para sa mga RORO nga may gilapdong dul-an sa napulo ka metro ang matag usa.

Ang gilapdon sa puwerto mga usa ka libog duha ka gatos ug kan-umag duha ka metro kuwadrado. Ug may siyete metros nga giladmon. Ang gilay-on gikas Bogo City Hall mga unom lang ka kilometro.

Kay ang mga trak-pasaheroan ug de karga makatabok na man ngadtos silingang mga lalawigan agi sa Siyudad sa Bogo, mao na kiniy maggahas unya sa daghan pang umaabot nga mga proyekto ug ingon man ang dugang pag-uswag sa mga negosyo sa maong dapit. Nan, dayag na lang nga magsilbi kining ganghaan sa kalamboan.—