Dili pa andam
Makigdulog sa kagabhion
Ang akong damgo
Nagmata ako
Usa ka multong naglakaw
Sa dalang may bildo
Nga gikatag
Nagmata ang kahimatngon
Walay kasayoran
Ang mga kuwaknit sa mansanitas
Sa iyang ritwal
Mibahakhak ang mga
Anananggal sa punoan sa dao
Naminaw kaniya
Ang mga aninipot ug nimpa
Gitilaan ko ang singot
Sa iyang aping
Samtang iyang gidagmay
Ang litaniya nga maoy
Awit sa among dugo
—Dinhi nato ipugas, Anak,
Ang subling pagkahimugso sa kaliwat nga tabunon.
Namuwak ang iyang anino
Og suryal nga mga salamin
Sa punoan sa matubato, nakigpatintero
Ang trayanggulo namong mga anago
Sama niadtong kaabunda pa
Ang pinulongan sa ting-ani
Nagkurog ang iyang
Tawhanong lawas
Dili tungod sa katugnaw sa gabii
Kondili sa baho sa asupre
Sa eskina sa iyang kalimutaw
Nanglandig ang mga galyon
—Hilom na, Anak,
Ako ang sabakan sa imong pagbakho.
Nabag-o ang hitsura sa lingganayng
Gisab-it sa iyang siko
Nga gitambol
Sa iyang bangkaw ug gapasan
Siya karon ang binag-ong oblasyon
Ang manggugubat nga
Naghubo
Ug sa lawas niyang hubo
Gihimugso sa kagabhion
Ang inampingang sanglitanan
Sa among mga ginikanan
Sa iyang tak-om nga kinumo
Nanglugsot ang lainlaing bulok
Sa prismo.
Giabyan ang iyang paglakaw
Sa nag-uwang nga kahilom
Napundok ang mga layang
Dahon sa kawayan
Sa bakanan; gibenditahan
Sa yamog ang mga tsinelas
Sa duwende ug agta
Nagkadugo ang sawumsom
Sa padayon niyang pagbikang
Ang tunob niya mao ang soneto sa banika
Maluibon ang laylay
Gikan sa Kasadpan
Gihagit nila ang kalig-on
Sa tanos nga mulbulan
Dala nila ang espada ug krusipiho
Nabati ko ang hinilakay
Sa tinghulaw
Nagtibarak sa tutunlan
Sa suba ang pagmahay
Sa kangitngit ug abog
Nanimahong pormalin
Ang hangin nga akong gihingos
Mangtas ang
Bakho sa ambulansiya
Giluwan niini ang patayng lawas
Nga gikaibgan sa
Pito ka espiritu sa ting-ulan
Sa unahan
Pinadunghay ang buhok
Ni Nanay
Naghiwasa ang kanhi
Hilom nga lugot
Ang mangliw ug tuktor
Sayong nanglupad-pauli
Gikalot ni Tatay ang giladmon
Sa iyang samad
Guba ang iyang dughan
Misugwak ang dugo
Sa iyang kaunoran
Naghagok pa ang itlog
Ni Ka Guiller
Gipalayas sa iyang tigib ang
Nag-alisngaw nga tinai
Sa mga rakista sa Kyusi
Pasagdan kong maglakaw nga maghubo
Si Tatay samtang magsud-ong
Ko sa metamorposis sa kabuntagon
—Ilupad ko ikaw, Anak
Sa ginghariang di maabot ni Lulid
OMAR KHALID
Sento Otso, Medellin, Cebu
(Ang bersiyong Tinagalog niining balaka Pinasidunggan sa Gawad Surian sa Tula-Gantimpalang Collantes 2007 ubos sa pagpasiugda sa Komisyon Sa Wikang Filipino.)
Balik sa: