| 
  • If you are citizen of an European Union member nation, you may not use this service unless you are at least 16 years old.

  • You already know Dokkio is an AI-powered assistant to organize & manage your digital files & messages. Very soon, Dokkio will support Outlook as well as One Drive. Check it out today!

View
 

Kulturanhong Kalihokan

Page history last edited by PBworks 16 years, 2 months ago

Dayon sa...

Hawanan sa Kulturanhong Kalihokan

 

  • Panapit-pahibalo sa LUDABI

ANG Lubas Sa Dagang Bisaya (LUDABI) mopahigayon sa ilang National Convention karong Enero 19, 2008 diha sa Casino Español, Dakbayan sa Sugbo ubos sa tema: "Ang Sinugboanong Binisaya sa Kalibotan sa mga Batan-on". Kini atol usab sa pagsaulog sa ilang ika-50 nga tuig nga kasaulogan (bulawanong kasumaran).

 

Nagpakatakos si Kanhi Pamuno Lungsod sa Cordova, Arleigh Jay C. Sitoy, pagdapit sa tanan nga mahigugmaon sa atong pinulongang Binisaya sa pagtambong sa maong kombensiyon aron kining maong panagpundok mahimong mabulokon uyamot. Alang sa dugang kasayoran palihog lang sa pagtawag ni Ronnie Baguio, sa no. (032) 496-9604 or Mobile No. 09228156981 o via e-mail neilz59@yahoo.com. Mabuhi ang LUDABI!—(Gipasupot ni M. FAELNAR)

 

 

  • PEN Phils., nagtagbo alang sa Kombensiyon

Ang sanga sa PEN sa Pilipinas, ang internasyonal nga kahugpongan sa mga magsusulat sa kalibotan, nagtagbo niadtong Sabado sa hapon, Oktubre 27, sa La Solidaridad Bookshop sa Ermita, Manila, aron pagplansa sa pangandam sa nagsingabot nga Nasodnong Kombensiyon sa PEN sa nasod.

 

Ang La Solidaridad Bookshop, maoy nahimong kasamtangang pugaran sa mga sakop sa kapunongan sanglit gipanag-iya man kini ni National Artist F. Sionil Jose, kinsa maoy presidente karon sa PEN Philippines.--ESG

 

  • Bisaya Association of Hawaii

(Napatik sa Katilingbanong panid nga Potogaleri -- Bismag 10-31-07)

 

Kinaiya na sa mga Bisaya ang pagtinagdanay ug pagtambayayongay mabisan diing nasora man sila idagsa sa balod sa pagpanikaysikay— mga hiyas nga lintunganayng iya sa kaliwatang Bisaya. Ug kini, labing seguro, ang gamot nga nagpabarog sa Bisaya Association of Hawaii sulod sa duha na ka dekadang paglungtad. Si Gng. Jesusa Rone, ang presidente karon sa BAH, mahinangpong mihinubay sa ilang mga kalihokang kulturanhon didto sa Hawaii uban ning gipadala niyang mga hulagway. Padayon usab diay silang nanagsunod sa mga gula sa Bisaya didto.

 

Si Gng. Rone masulatan sa adres: 1576 Haka Dr., Apt. 1101, Honolulu, HI 96817.

 

-- (Mga hulagwaty ug caption dili na ikabutang dinhi.)

 

  • Kapunongang Bisaya, nagtagbo

TUNGOD sa malamposong “Dalit Bisaya Cultural Festival” nga gipahigayon didto sa University of San Carlos, Cebu City kaniadtong Disyembre 1, 2 ug 3, 2006, ang Kapunongang Bisaya nagplano sa pagpahigayon og susamang kalihokan sa Kaulohan.

 

Sa usa ka tigom-panihapon sa haluag nga UP Executive House sa kampus sa Unibersidad sa Pilipinas, Diliman, Quezon City kaniadtong Septiyembre 14, 2007, gisugdan ang pagplansa sa proyekto linamasan sa hangpanay ug awitay sa iyang mga sakop.

 

Si Dr. Jose V. Abueva, usa sa tigpasiugda sa maong kapunongan naglaraw nga ang konsiyerto itumong sa buwan sa Pebrero sa sunod tuig. Lima ka lugar ang gipilian nga pahigayonan sa kalingawan: U.P. Theatre, Araneta Coliseum, CCP, Folk Arts Center o kaha sa PICC.

 

Ang pasundayag salmotan sa mga Bisaya nga mga mag-aawit.

Ang tigom gitambongan sa inilang mga Bisaya nga nanimuyo na sa kaulohan apan padayong nagmahal sa inahang dila. Mitambong usab isip bisita si Justice Villaluz sa Sandiganbayan sanglit pyur Bisdak man usab ang iyang kapikas.

 

Sakop ning maong kapunongan ang prominenteng mga Bisaya sa kaulohan sama nilang: Dr. Dodong Nemenzo, kanhi presidente sa U.P.; Major General Ramon E. Montaño (Ret), anak sa bantogang magsusulat sa Bisaya Magazine sa wala pa ang Ikaduhang Gubat— Estrella Enriquez; Cerge Remonde, kanhi kolumnista sa Bisaya Magazine ug karon dako-dako sa Presidential Management Staff; Napoleon V. Abueva, National Artist; Kanhi Senador Rene Espina; Atty. Napoleon G. Rama; Frank Abueva; Tet Maceda; Edgar S. Godin ug Richel G. Dorotan sa Bisaya; ug daghan pa.

 

Ang Kapunongang Bisaya sa Manila nagtinguha sa pagpreserbar ug pagsabwag sa kulturang Bisaya sa tibuok kapupud-an aron kapanalipdan ang hinay-hinayng pagkamatay sa maong etno-lingguwestikong grupo batok sa nagkalainlaing hinungdan. Pinaagi niining serye sa mga pasundayag, ang musikang Bisaya mapaila-ila usab ngadto sa mga bag-ong tubo.

 

Alang sa dugang kasayoran sa kalihokan sa kapunongan, mahimong pakisayran si Dr. Abueva sa tangkilepono numero 0917-844-0046 kun sa email joseabueva@yahoo.com.-- TNB

Comments (0)

You don't have permission to comment on this page.