Bisaya Mabasa Na Sa Cyberspace


Ni E.S. GODIN

Mga hulagway kuha ni Jim G. Punzalan

Bisaya Agosto 20, 2014

 

Ang Bisaya e-magazine mahimong mapalit

pinaagig suskrisyon ug mahimo pong mopalit og tinagsa, depende sa

isyu nga inyong gusto. 

 

SA kataposan, ang komun nga problema kon asa makapalit og kopya ning Bisaya partikular sa mga suki niini nga atua na sa laing kanasoran o kaha naa sa hilit nga mga lungsod nga wala na maabot sa sirkulasyon niini, nasulbad na. Ang Bisaya magasin ug ubang mga magasin sa Manila Bulletin sayon na kaayong mapalit, mabasa ug matipigan bisan hain ka pang dapita sa kalibotan.

 

Pinaagi sa labing bag-ong teknolohiya sa internet, ug sa serbisyo sa buqo, usa ka kompaniya sa online app store nga maoy partner sa Manila Bulletin, ang Bisaya e-magazine ug ubang e-magazine sa Manila Bulletin (Liwayway, Bannawag, Hiligaynon, Cruising, Sports, Agriculture, Animal Scene, ubp.) gilusad niadtong Agosto 5, 2014 didto sa Madison’s Bistro Moderne sa Shangri-La Hotel ug kini available na sa tanang buot mosulay.

 

Ang maong launching gitambongan sa mga key player ug stakeholder sa industriya sa publikasyon, print version man o sa online. Nagsilbing highlight sa maong kalihokan ang presensiya sa mga editor sa giilang classic nang mga magasin sa Pilipinas nga tagsa-tagsang gitawag aron ipaila sa mga bisita.

 

Nanambong usab ang mga tinugyanan ug mga representante sa nanag-unang mga advertising agency sa nasod aron pagsaksi sa maong makasaysayanong kalihokan. Lain kining dakong tikang sa Manila Bulletin ug laing makasaysayanong anib sa atong tangkod nang 84-anyos nga Bisaya sanglit timailhan kini nga ang atong pinanggang magasin miambit na niining modernong panahon sa teknolohiya nga tigawag og computer age. Nga kon hangopon lang sa bag-o niining target audience, way duhaduha nga nagpasabot kinig dugang pang kutay sa katuigan nga ilahutay sa atong magasin.

 

Hinuon, ang Bisaya e-magazine maakses lang sa mga himan (smartphone, tablet, ipad, ubp.) nga may android kun iOS nga operating system. Nagpasabot kini nga kon dili android operated ang imong gadget, dili nimo mabuksan ang mga pahina sa Bis-e-mag. Apan kinsa ba goy wala pa makabaton niining android operated nga mga tangkilepono ug tablet karon? Halos tanan duna na, ug gihimo lang ganing dulaan sa mga bata. Busa, hala, dasigon ta ang atong mga higala, kaparyentehan, ilabi na ang mga bata sa paghimong mapuslanon sa ilang mga gadget pinaagi sa pagbasa. Labi na gyod sa kabanayan nato nga tua na sa laing mga nasod manimuyo, kinsa gimingaw sab kaayo sa kultura sa kaliwat ingon man sa atong pinulongan, hala, sayri sila ning labing bag-ong kalamboan. Nakaseguro ko nga sa pagbasa-basa nila ning Bisaya, bation nila nga mora na pod silag nakauli sa ilang dapit nga natawhan.

 

Sa laing bahin, kining maong lakang sa Manila Bulletin wala magpasabot nga milugak na kini o gilaayan na pagtanyag ug pagpakatap sa pinatik nga kopya (printed version). Padayon gihapon ang kampanya sa MB pagsabwag sa iyang pinatik nga mga basahon sa kaprobinsiyahan. Gani, kamulo man ang pagpanukod og mga sangang buhatan niini (labing ulahing gibuksan ang Cagayan de Oro Branch ug Dumaguete Branch) aron labi pang mapalapdan ang langyab sa maabot sa mga kopya niini bisan sa hilit nga kabaryohan.

 

Ang Bisaya e-magazine mahimong mapalit pinaagig suskrisyon ug mahimo pong mopalit og tinagsa, depende sa isyu nga inyong gusto. Nagpasabot pod ni nga kon tigpalitan ka sa printed version apan may isyu nga wala kay kopya kay nahutdan na, karon, mahimo na nimong mabasa ang maong isyu pinaagi sa Bis-e-mag.

Ning maong teknolohiya, ang mga researcher usab nga nagpangitag partikular nga gula sa Bisaya sayon na lang makaangkon sa maong kopya. Ug labihang sayona ra sa pag-order gamit ang gadget mismo, ang bayad mahimong pinaagi sa banko, mga bayad center, bisan gani ang cellphone load puyde ikabayad.

 

Sa akong tan-aw, ang labing bug-at nga puntos ning maong kalamboan mao ang kasayon ug aksesabiliti o paglapad sa langyab sa merkado nga parehong plus factor ngadto sa mga consumer ug mga advertiser. Tiaw bay dili ka na kinahanglang mogawas sa balay aron makabasa sa bag-ong hulad sa kinaham nga Bisaya kay pinaagi sa imong account sa buqo app ug credit card, ma-download na nimo dihadiha ang isyu sa Bis-e-mag nga imong gikahinaman. Ug haskang tin-awa pa ra ba sa matag pahina kay wala na man ang mga mantsa ug sami-sami nga mugna sa tinta sa imprenta. Nah, mor pa, sulayi ra!

 

Sa pikas bahin, kining maong kalamboan nagsilbi usab nga dangilag sa among kadasig nga mas pang panindoton ang matag hulad ning Bisaya— sa unod niini ug ingon man sa biswal nga aspeto. Ug nanghinaot mi nga pinaagi niini, ang mga magtatampo usab samang magmadasigon sa pagtampo og dugang pang de kalidad nga mga sinulat. Bravo, Bisaya!—