ARON magpadayon ang paglambo ug pagtunhay sa pinulongan ug katitikang Sugboanon, ang Bathalan-ong Halad sa Dagang, Inc. (BATHALAD-Sugbo) nagpasiugda og tigi sa sinulatay sa Balak, Sugilanon, Gumalaysay, ug Usa-ka-Yugto nga Drama. Ang ‘deadline’ sa pagpanawat og salmot unya sa Disyembre 15, 2016. May espesyal nga ganti alang sa ‘Magsusulat sa Tuig’ nga pagapilion sa usa ka respetadong hunta sa mga maghuhukom nga maglakip sa ‘Council of Past Presidents’.

Ang mga ganti karong tuiga pagailhon ning mosunod: “Dr. Mel & Thelma Allego Bathalad Balak Award” (ubos sa pag-esponsor sa nasangpit nga magtiayon); “Dr. Juvenal & Rebecca Jabel Bathalad Sugilanon Award” (sa sponsorship usab ning maong magtiayon); “Brgy. Kapitan Marcial E. Lariosa Memorial Awards for Cebuano Essay” (nga giesponsoran usab sa pamilya kun mga anak ni Ernesto D. Lariosa), “Atty. Gerardo D. Lariosa One-Act-Play Award” (sa pagpaluyo ni Dr. Aurorita Lariosa-Dayon) ug “Dr. Elmaslias & Chit Menchavez Bathalad Magsusulat sa Tuig Award” (sa pag-esponsor usab sa nasangpit nga magtiayon).

Ang mga ganti sa balak, sugilanon, gumalaysay, ug usa-ka-yugto nga drama: Unang ganti- P5,000; ikaduhang ganti- P3,000; ikatulong ganti- P2,000. May tulo (3) ka pinasidunggan matag kategoriya nga hatagan og P1,000 kada usa. Ang “Magsusulat sa Tuig” makadawat usab og ganting cash nga P5,000.

MGA LAGDA

1. Ang tigi kun bangga bukas alang sa tanang mga magsusulat (batan-on ug dili batan-on, tamsi ug agila, piso ug tadhan). Ang mga sakop sa Bathalad makaapil sa bangga, gawas sa pamuno, puli-pamuno, kalihim ug mamahandi sa BATHALAD-Sugbo ug ang nangaging mga pamuno sa kapunongan nga ilhong mga sakop sa ‘Council of Past Presidents’ nga maoy nagpahigayon ning maong tigi sa sinulatay.

2. Ang salmot sulaton sa Binisayang Sinugboanon.

3. Makasalmot bisag pila ang usa ka magsusulat sa bisan unsang kategoriya, basta patabanan og entry fee nga P100 ang matag entry. Ang matag salmot kinahanglan makinilyahon o ikompyuter sa tagurha ka lab-ang (double spaced) diha sa mubo nga bond paper (8-1/2 x 11). Kon ikompyuter gamita ang Times New Roman, font 12.

4. Ang balak dili molabaw sa duha (2) ka pahina. Ang sugilanon gikan sa pito (7) ngadto sa napulog lima (15). Ang gumalaysay gikan sa lima (5) ngadto sa pito (7) ka pahina. Ang usa-ka-yugto nga drama gikan sa napulo (10) ngadto sa kinse (15).

5. Ang tanang salmot kinahanglang orihinal gayod kun kaugalingong mugna kun ugba sa tagsulat, dili kinopya o hinubad sa laing sinulat nga iya sa laing magsusulat. Mahimong ang mga salmot napatik na o wala pa, basta nga kini wa pa gayod makadaog dagkong mga ganti (major prizes) sa bisan unsang tigi o bangga sa sinulatay sa nangaging mga panahon.

6. Ipadala ang upat (4) ka tin-aw nga kopya sa salmot (lakip ang orihinal). Way ngalan sa tagsulat o takoban nga ibutang sa salmot. Ang ulohan lamang sa sinulat ang ibutang.

7. Ang ulohan, tinuod nga ngalan sa tagsulat, ug adres isulat sa gamayng papel ug isulod sa gamayng sobre nga selyado. Sa tinakpang sobre, isulat ang ulohan ug kategoriya sa salmot, ug isulod sa dakong sobre uban ang salmot ug entry fee nga ipaagi sa postal money order ubos sa ngalan ni Lamberto G. Ceballos, tsirman sa komite sa bangga.

8. Kadtong mga salmot nga makalapas sa bisan haing lagda ning bangga isipon nga way labot sa bangga ug dili na ulian sa ilang entry fee. Way tulubagon ang Bathalad-Sugbo niadtong mga salmot nga wala madawat kay nawani sa pahatanan kun ‘lost in transit’. Ang tanang mananaog nga salmot ning bangga iyahon na sa Bathalad-Sugbo aron iapil pagpunpon sa usa ka libro.

9. Ang tanang salmot mahimong ipadala sa koreyo o itunol sa linawas ngadto sa Komite sa Tigi sa Sinulatay sa Bathalad-Sugbo 2016 c/o LAMBERTO G. CEBALLOS, Sun.Star Superbalita, Sun.Star Publications Bldg., Cor. P. del Rosario & Don Pedro Cui Sts., Cebu City.

Ang pagpanghatag sa mga ganti ug mga sertipiko sa pagdaog himoon unya sa Enero 2017. Si Dr. Mel Allego, ‘founder’ sa kapunongan, maoy mangunay pagpanghatag sa mga ganti. Ang dapit ug petsa ipahibalo ra unya.

LAMBERTO G. CEBALLOS

Tsirman, Komite sa Tigi