BUQO e-Bookstore: TULPOK SA BINAG-ONG PAMAAGI SA PUBLIKASYON

Ni JOSE AL. LIMPANGOG 

MV Cohiba, Tubarao, Brazil

Bisaya, 13 Abril, 2016 

DAKONG kalamboan sa natad sa publikasyon kining panaglambigit sa Manila Bulletin Publishing Corporation (MBPC) ug Hand.Interactive, Inc. (HII). Ang MBPC mao ang tagmantala sa kinaham tang Bisaya Magasin ug uban pang kusogang mga magasin sa nasod, samtang ang HII mao ang tag-ugmad sa Buqo, ang bag-ong e-bookstore alang sa Pinoy nga mga magasin, peryodiko ug libro. Gamit sa Buqo ang plataporma sa Ookbee, ang kinadak-ang digital bookstore sa Thailand. Giingong kapin na sa lima ka milyon ang nanaggamit karon sa Ookbee sukad nahimugso kini sa digital nga kalibotan niadtong 2010.

Kanato nga kanunayng nagbiyahe o taas ang panahon nga gigugol sa pagbiyahe matag adlaw, mahimo nang makapalit ug makabasa sa kinaulhiang haon sa paborito tang Bisaya Magasin (ug daghan pang mga basahon) pinaagi sa Buqo gamit ang smartphone kun tablet samtang anaa sa kadalanan basta aduna lay koneksiyon sa internet. Mao sad sa mga nanag-opisina nga wa nay panahon pa paghapit sa uska magazine stand ug sa mga mulupyo sa kalungsorang wa o nihit ang gipamaligyang mga basahon. Ablihi lang ang bentana sa Buqo ug sa sulod makapili kas unsay imong gusto ug hilig: mga basahong panglalaki, pangbabaye, pangbata, ug uban pa. Bahin sa digital nga Bisaya, mapalit ang mga isyu niini gikan sa Hulyo 9, 2014 hangtod sa kinaulhian sa samang kantidad sa pisikal nga magasin.

Labing mapuslanon ang Buqo alang sa mga magbabasa nga karon nanimpalad sa laing kanasoran sama nako. Atua man kita nanginabuhi sa isla sa Palau, sa oil field sa Saudi Arabia, sa Marina Bay Sand sa Singapore, sa cruise ship sa Caribbean, basta adunay akses sa internet, mahimo na natong i-download ang gikahidlawang mga basahong Pinoy diha sa komun nga mga gadget sama sa esmartpon o tablet nga gipadagan sa Android o iOS. Dakong iban baya sa kamingaw sa yutawhan ang pagbasa sa bag-ong haon nga paboritong magasin. Tinuod kini. Sa akong imahinasyon, daw magduyan-duyan ko ilawom sa kahoyng sambag samtang magbasa sa kinaulhiang gula sa Bisaya.

Unsaon Pag-abli Ang Buqo Digital Bookstore

Mao kini ang akong suliran sa una. Naungot man god ang akong hunahuna sa tradisyonal nga paagi sa pagbasa diin pisikal nga basahon ang pakli-paklion. Di pa man god komun ang digital nga mga basahon sa atoa. Apan sa kahimtang sa akong pamuo angay gyod nga mosakay pod ko sa mga pako sa digital nga teknolohiya. Maong niadtong miaging tuig (2015), gibisita ko ang buhatan sa Manila Bulletin sa Sugbo aron makisayod bahin sa digital nga Bisaya Magasin. Sama nako, kuwang pod diay ang ilang alamag bahin niini. Hinuon, ila kong gihatag dayon ngadto sa usa ka empleyada sa Buqo mismo nga anaa nagsukad sa Robinsons Cybergate Tower sa Mandaluyong City. Nahayagan ang akong hunahuna.

Sama sa ubang digital nga plataporma, ang Buqo aduna usay application nga mahimong i-download sa Google Play (alang sa Android) o App Store (alang sa iOS), tablet man o esmartpon ang atong himan. Siyempre, sa pag-download kinahanglang naka-online ta ug nga maayo ang signal aron di maputol ang proseso sa pagrehistro ug paghimog account. Gikinahanglan usab dinhi ang atong e-mail address.

Human sa malamposong proseso, atong makita ang icon sa Buqo uban sa lain pang mga app nga anaa na sulod sa atong gadget, ug kini andam nang gamiton pag-abli sa digital nga tindahan. 

Unsaon Pagpalit og Bis-e-mag

Gitawag ni Editor E.S. Godin and digital nga Bisaya Magasin og Bis-e-mag. Ato ning sundon kay siya ang “ninong” pagbunyag ini niadtong Agosto 5, 2014.

Ang Bis-e-mag mahimong paliton pinaagi sa credit card o sa cellphone load (Smart ug Sun lang – way labot ang Globe). Ang ikaduhang opsiyon maoy akong gigamit sanglit komun, dali ug sayon ipahigayon. Kini usab ang nakapayunik sa Buqo tandi sa ubang e-store – daling paliton sa yanong mga konsumidor. Ug unsay tulpokon aron makapalit kitag Bis-e-mag gikan sa Buqo e-store? Atong sundon kini:

1. Kinahanglang nakaonlayn ang atong gadget.

2. Tulpokon ang aykon sa Buqo. Makita sa seksiyon sa STORE ang “Books”, “Magazines”   ug “Newspapers.” Tulpokon ang “Magazines.” Huwatong motungha ang mga magasing gipamaligya uban sa ilang mga kantidad. Usahay dugay kini nga proseso, depende sa gikusgon sa internet.

3. Pangitaa ang Bis-e-mag uban sa daghang mga e-magazine nga mahimo usab nga paliton sama sa Agriculture, Cruising, Top Gear, FHM, Men’s Health, ubp. Atong makita ang haping hulagway sa magasin. Tulpokon kini. Huwatong motungha ang pilianan: view price, preview ug add wishlist. Tulpokon ang view price. Dinhi mahimo nang tan-awon ang nangaging mga isyu, ug mahimo na sad nga tulpokon ang bisan hain niini aron paliton.

4. Mamili ta pila ka isyu ang paliton. Kon gusto tang mo-subscribe, tulpokon lang ang sibo sa atong gusto ug sa maarang sa atong load sa selpon. Apan agig suway-suway, usa lang ka isyu ang atong paliton, ang kinaulahian (aw, naa ra god nato kon baleg usa ka tuig dayon ang atong bayran).

5. Human mamili pila ka isyu ang paliton, tulpokon ang checkout. Sunod, tulpokon ang proceed to checkout. Dinhi mamili ta asa ipaagi ang bayad: Smart, Sun Cellular o Talk ‘n Text.

6. Isuwat sa kahon ang gipangayong numero sa atong selpon. Huwatong moabot sa atong selpon ang mensahe gikan sa Buqo nga maghatag og one-time PIN. Lima ka digit kini. Kon moabot na ang mensahe, isuwat dayon ang mga numero didto sa kahon ubos sa gisuwatan sa numero sa selpon sulod sa tulo ka minuto lang. Huwaton nga moabot ang laing mensahe sa Buqo didto sa selpon nga magpahibawo nga miiban na sila sa atong load sa kantidad nga sibo sa atong gipalit. Human niini mahimo na natong sugdan pagdawnlod ang Bis-e-mag (o unsa pa dihang atong gipalit).

Unsaon Pag-dawnlod ang Pinalit nga Basahon

Hinumdomi nga sa pagdawnlod kinahanglang nakaonlayn ang gadget, ug labing maayo kon paspas ang internet. Lima ka minuto, labing dali, madawnlod na ang usa ka hulad sa Bis-e-mag. Apan dihay higayon diris Brazil nga usa ka adlaw pod ang pagdawnlod sa usa ka isyu – depende lagi sa gikusgon sa internet. 

Sundon kining mga lakang:

1. Ablihan ang librariya sulod sa MY LIBRARY (ibabaw sa STORE). Makita ang pinalit nga basahon nga hanap pa. Tulpokon kini. Mopuli ang laray sa mga aykon sa Ookbee ug ang progress bar sa pagdawnlod. Sunod-sunod nga motungha ang mga panid sa basahon puli sa mga aykon sa Ookbee. Dinhi, kon naghinam-hinam na kita, mahimo nang basahon ang makitang mga panid; di na kinahanglang huwaton pang mahuman ang pagdawnlod.

2. Human madawnlod ang tibuok basahon, mahimo na kining basahon nga offline ang gadget. Bisan pag atua kitas kinalay-ang bukid namutol og sugnoron, o nagbakasyon sa Machu Picchu sa Peru, o naglawig taliwa sa Atlantic Ocean, mahimo nang magbasa-basa sa bisan unsang oras sama nga atong dala ang tibuok basahonan. Ang mga hulagway ug mga ilustrasyon tataw pa gyod kayo ug way sami.

Bahin sa suskrisyon, awtomatik nga motungha sa library ang bag-ong gula basta nakaonlayn ta, ug idawnlod gihapon kini sama sa gipalit og tinagsa. Angay hibaloan nga ang digital nga Bisaya moguwa ulhig uska semana sa pisikal nga magasin. Pananglitan: ang papel nga isyu nga pinetsahan og Marso 23 giapod-apod na Marso 16 pa lang, samtang ang digital nga bersiyon niini motungha Marso 23-24 pa.

Uban Pang Feature sa Buqo e-Store

Anaa pay daghang feature sa Buqo nga atong magamit sama sa paagi sa pagbayad, libreng mga basahon, mga basahong may diskuwento, ubp. Ang labing nindot niini mao nga mahimo natong i-share ang usa ka panid ngadto sa kahigalaan pinaagi sa Facebook, Twitter, Line ug e-mail. Kana kon aduna kitay account ning maong mga medya.

Ingon niini ang proseso: tulpokon ang panid nga buot natong ipahat, pananglitan panid sa Gitikgitik. Motungha ang simbolo sa “share” ug tulpokon usab kini. Motungha dayon ang mga aykon sa gihisgotang mga medya. Tulpokon ang, pananglitan, Facebook, ug sundon lang ang instruksiyon sa screen hangtod ma-post ang maong panid. Dihadiha, makita dayon sa atong FB friends nga Bisdak ang gipasaw-ang panid sa Bis-e-mag bisan haing suok sa kalibotan sila nagpuyo basta nakaonlayn lang.

Sa kaulahian, tingali makahunahuna silag suskribir og ilaha. Kalamboan kini sa inahang dila.—