Bisaya Magasin

 

Tawag Alang Sa Gustong Magpasakop Sa NCCA Committee

Page history last edited by Edgar S. Godin 2 yrs ago

Tawag Alang Sa Gustong Magpasakop Sa NCCA Committee

 

ANG National Commission for Culture and the Arts (NCCA) kasamtangang nag-update alang sa heneral nga kasakopan sa iyang napulog siyam ka komite nasyonal.

 

Sa tinguha sa halapad nga pagsangyaw ug panawagan sa pakiglambigit sa katawhan, ang NCCA nanawat na karon og aplikasyon alang niadtong interesadong mahimong sakop sa komite. Ang pagpanawat matapos karong Nobiyembre 16, 2007.

Sa paglangkob, ang buluhaton sa mga sakop sa komite mao kining mosunod:

 

1. Mahimong yuhotanan sa komunikasyon ngadto sa komunidad kabahin sa mga kalamposan, katuyoan, pedbak sa mga kalihokan nga gipasiugdahan sa NCCA, ug mahimong tuboran sa mga alinghuna alang sa kalamboan sa mga sektor nga ilang girepresentaran.

 

2. Pagatahasan sa pagdumala sa implementasyon sa mga programa sa Komisyon, proyekto ug kalihokan, kon pananglit gikinahanglan.

 

3. Pagdasig sa pagsalmot sa komite pinaagi sa pagpadaghan sa kasakopan.

 

4. Pagpili sa Kasakopan sa Konseho Ehekutibo (ExeCon) sa ilang masigkasektor.

 

5. Pagduso sa listahan sa mga sakop ngadto sa NCCA Secretariat.

 

Nag-unang kalipikasyon sa mahimong sakop sa komite:

 

1. Lungsoranong Pilipinhon ug anaa sa legal nga pangedaron ug maayog reputasyon sa komunidad.

 

2. Adunay igo-igong kaikag, kasinatian ug panerbisyo sa iyang sektor.

 

3. Nakakab-ot og hataas nga lebel sa kabatid lambigit sa iyang gibarogan nga komite.

 

4. Pangulo kun sakop sa usa ka kapunongan nga giila sa NCCA kun girekognisar sa bisan unsang ahensiya sa kagamhanan.

 

5. Adunay langyab nga panabot sa arte ug kulturang Pilipinhon sa kinatibuk-an, kun sa iyang pihong sektor.

 

6. Adunay katakos sa pagrepresentar sa NCCA kun sa iyang sektor sa lainlaing matang sa panagtigom nga may kalambigitan sa iyang posisyon.

 

7. Nagbaton og abilidad sa pagtukod og mga network alang sa NCCA.

 

8. Andam pagpahat og igong panahon ug paninguha alang sa buluhaton sa komite.

 

Ang Porma sa Aplikasyon sa Pagpasakop ug sa Pihong Batakan sa Mahimong Sakop sa usa ka partikular nga komite makuha sa Project Management Division (PMD) o kaha bisitahi ang www.ncca.gov.ph. alang sa kasayoran. Alang sa pakisusi, mahimong kontakon ang PMD sa mosunod nga mga numero: 527-22-14, 527-22-09 kun sa 527-21-92 lokal 502 hangtod 509.

 

Iduso ang imong hitsas nga porma sa aplikasyon sa pagka sakop, talaan sa impormasyon sa pagka tawo nga pinatangagan og 2 x 2 nga retrato uban ang endorsement ngadto sa PMD kun pinaagi sa fax sa 527-21-98 kun sa koreyo sa National Commission for Culture and the Arts, 5th Floor, 633 Gen. Luna Street, Intramuros, Manila.

Comments (0)

You don't have permission to comment on this page.

Printable version
 
Anonymous Create an account or Log in