Talaang Ginto: Gawad Surian Sa Tula-Gantimpalang Collantes 2008

ANG tinuig nga tigi sa pagsulat og balak nga Filipino bukas na usab alang sa tanang buot mosalmot. Matod ni Miriam Kabila, tinugyanan sa Sangay sa Pagsasalingwika ilawom sa Komisyon sa Wikang Filipino (KWF) nga ang ilang buhatan nanawat na og salmot sukad pa niadtong buwan sa Enero. Ania ang mekaniks sa pagsalmot:

1. Ang Talaang Ginto: Gawad Surian Sa Tula-Gantimpalang Collantes usa ka tigi sa pagsulat og balak nga managsamang gipaluyohan sa Komisyon sa Wikang Filipino (KWF) ug Jorge Collantes Foundation nga may kalabotan sa pagsaulog sa Adlaw ni Balagtas matag Abril 2.

2. Gitinguha sa tigi nga (a) pahimsogon ang pamalak nga Filipino pinaagi sa pag-ila sa banggiitan ug bag-ong talento ug (b) palamboon pa ang matang sa pamalak nga Filipino.

3. Ang tigi bukas sa tanan, gawas lang sa mga kawani sa KWF ug sa ilang mga kabanay, ug sa nahimong mga Magbabalak sa Tuig gikan sa 2006-2007.

4. Ang mga entrante nga makadaog og lima ka higayon isip “Magbabalak sa Tuig” awtomatikong ituboy sa “Bantawan sa Kabantog” ug sab-ongan og pag-ila gikan sa KWF sa usa ka pinasahing okasyon aron pasidunggan ang talagsaong kalamposan nga nakab-ot sa natad sa arte sa pagsulat og balak. Mahimo gihapon siyang moapil sa mosunod pang mga tigi sa KWF kon buot niya.

5. Gawasnon ang dugokan. Walay gitakda nga gitas-on. Mahimong isalmot ang mga balak nga sinukod ug binagay, mahimo usab ang berso libre. Usa lamang ka salmot ang mahimong isumiter sa matag entrante. Andamon ang salmot sa upat ka kopyang makinilyado o kompyuterisado nga adunay tagurha ka giblang sa bond paper nga may sukod nga 8 ½” x 11”. Kinahanglang orihinal gayod sa tagsulat ang iyang salmot ug dili kinopya sa sinulat sa uban. Dili pasayloon ang si kinsa mang hisakpang nakalapas sa pagpangopya. Kanselahon sa KWF ang mananaog nga salmot ug di na gyod makasalmot pa sa bisan unsang tigi nga pasiugdahan sa KWF. Ang salmot kinahanglang wala pa mapatik sa bisan unsang publikasyon ug wa pa usab ikasalmot sa bisan unsang tigi. Dili usab dawaton ang mga salmot nga bisan pa mag orihinal, rinebisar lamang diayng bersiyon gikan sa usa ka karaan ug napatik nang balak. Gitinguha sa KWF nga makakita og mga kausaban sa pamalak nga Filipino. Ang salmot dili butangan og ngalan sa tagsalmot o bisan unsang timailhang magtumbok kaniya. Ang ngalan ug pinuy-anan sa entrante ug uban pang personal nga impormasyon kinahanglang isulat sa linaing papel kun sa pormularyo sa pagsalmot nga makuha nga libre sa KWF.

6. Ang mga salmot mahimong personal nga isumiter kun ipadala ba sa koreyo niining adres: Lupon sa Tula 2008, Komisyon sa Wikang Filipino, 2nd Floor Watson Bldg., 1610 J.P. Laurel St., San Miguel, Manila

7. Ang kataposang adlaw sa pagdawat og salmot mao ang Marso 10, 2008. Ang mga salmot nga gipadala pinaagi sa koreyo kinahanglang madawat na sa KWF nga di molapas sa nahisgotang petsa.

8. Ang mga ganti mao ang mosunod: Unang Ganti, P15,000.00 ug kadungganang pagaisipong “Magbabalak sa Tuig”; Ikaduhang Ganti, P10,000.00; Ikatulong Ganti, P8,000.00. Tunolan usab og tropeyo ang mga mananaog sa major prizes. Hatagan usab og tag-P3,000.00 ingon man plake ang tulo ka mananaog sa pinasidunggan. Makadawat usab og pamatuod sa pagdaog ang tanang mananaog.

9. Angkonon sa KWF ang katungod sa pagpatik sa tanang mananaog nga salmot nga dili na mohatag og royalti sa mga magbabalak.

10. Ang hukom sa mga hurado dili na malubag ug dili na magukod.

Alang sa dugang kasayoran, mahimong manigsusi sa Sangay ng Pagsasalingwika o Sangay sa iba pang mga Wika at Literatura sa Pilipinas sa telepono numero 736-2524/25 lokal 105 o 115.