Bisaya Magasin

 

Sumbanan sa Hall of Fame sa BATHALAD-Cebu, giusab na!

Page history last edited by Edgar S. Godin 1 yr ago

SUMBANAN SA ‘HALL OF FAMER’ SA BATHALAD-CEBU GIUSAB

 

USA ka mahinungdanong miting ang gihimo sa mga opisyal ug mga sakop sa Bathalan-ong Halad sa Dagang, Inc. (BATHALAD-Cebu) didto sa Joven’s Seafoods, sa Don Sergio Osmeña Sr., Blvd., Cebu City, niadtong alas otso sa gabii sa Enero 30, 2008.

 

Mitambong sa maong miting si Dr. Melquiadito M. Allego, Jr. nga maoy nag-preside. Mitambong usab si Gng. Thelma “Babe” Allego, pinanggang kapikas sa founder sa BATHALAD. Nagbalikbayan ang magtiayon kay sakop sa usa ka medical mission didto sa Davao ug aron pagtambong sa Sinulog ug pista sa Santo Niño.

 

Sa maong miting, gikauyonan nga panahon na nga usbon ang sumbanan sa paghatag og pasidungog nga Hall of Famer ngadto sa mga sakop nga angayan ug kalipikado nga modawat sa maong pasidungog samtang buhi pa sila ug makatagamtam pa og kahimuot sa ganti sa ilang pagka magsusulat. Sukwahi sa unang patakaran diin ang ituboy sa Hawanan sa Kabantog mao lamang kadtong mga magsusulat nga nanagpakadaog og lima ka unang ganti sa usa ka kategoriya sa panulat (sugilanon o balak o gumalaysay, ubp.), gikauyonan nga ang lima ka unang ganti langkoban na sa bisan unsang kategoriya o kombinasyon niini. Pananglitan, ang usa ka kandidato alang sa pasidungog nga nakadaog na og tulo ka unang ganti sa sugilanon, usa sa balak ug usa sa gumalaysay mahimo nang ituboy nga hall of famer. Mahimo sab nga siya nakadaog og lima ka unang ganti sa lima ka kategoriya: sugilanon, balak, gumalaysay, usa-ka-akto nga drama ug nobela. Way labot ang kontes sa Gitikgitik ug Motto ug Slogan.

 

Ang tigi nga nadag-an sa usa ka magsusulat mahimong gipasiugdahan sa Cultural Center of the Philippines (CCP), Palanca Memorial Literary Awards, Gawad Komisyon, Ludabi, BATHALAD-Cebu, BATHALAD-Mindanao, Dagang Foundation Inc., WILA (Women in Literary Arts-Cebu) ug ubang kapunongan nga nagmanggad sa kultura ug pinulongang Binisaya sama sa Sun.Star Superbalita-Gob. Gwen Garcia Bangga sa Sinulatay.

 

Sa pagkakaron, duna lamay lima ka hall of famer ang BATHALAD-Cebu sukad sa pagkatukod niini niadtong Agosto 19, 1969— sila si Melchor Yburan (balak) 1989; Melito Baclay (balak) 1994; Temistokles Adlawan (sugilanon) 1995; Michael Obenieta (balak) 2004; ug Ernesto Lariosa (balak) 2005. Dihay tuig nga si Gremer Chan Reyes unta ang hall of famer sa sugilanon, apan wala kini niya dawata.

 

Alang ning maong katuyoan, giawhag ang tanang mga sakop sa BATHALAD-Cebu nga mopadala og listahan sa ilang mga sinulat nga nakadaog sa unang ganti ubos ning han-ay: ulohan sa sinulat, kategoriya, tigpasiugda, petsa/tuig sa pagdaog (kon mahimo lakipan og photocopy sa sertipiko sa pagdaog). Ipadala ngadto kang Lamberto G. Ceballos c/o Sun.Star Superbalita, Sun.Star Bldg., corner Don Pedro Cui-P. del Rosario Sts., Cebu City. Deadline: Mayo 31, 2008.

 

Ang tanang angayan nga ituboy sa hawanan sa kabantog hatagan og sertipiko o plake sa umaabot nga kombensiyon sa BATHALAD-Cebu nga gitakda sa Enero 2009 nga tambongan ni Dr. June Allego nga maoy mangunay pagpanghatag sa pasidungog ug mga ganti sa tigi sa sinulatay nga ipahigayon karong tuiga.—

Comments (0)

You don't have permission to comment on this page.

Printable version
 
Anonymous Create an account or Log in