Mirror of Fortune (Bismag 05-14-08)

(ANG INYONG KAPALARAN SA MAYO 14 – 20, 2008)

TAURUS (Abril 21 – Mayo 21) – Matigayon ka sa imong giplano. Bation mo ang kalagsik human ka mag-ehersisyo. Mopalit kag bag-ong kahilipsan sa panimalay. Mapuypoy ra ang imong kasuko sa imong anak. Sundon mo ang tambag sa imong inahan. Tabunokon ang romansa. Miyerkoles ang suwerte mong adlaw ug 8, 7, 9 ang palaran mong numero.

GEMINI (Mayo 22 – Hunyo 21) – Niining semanaha modugap ka pagpakighugoy sa imong katalirongan. Magpahimulos ka sa paglingaw-lingaw sa di pa magsugod ang klase. Mokuha kag kurso sa interior design. Masabtan mo ang laing tinagdan sa imong manghod. May mohatag nimog kapuslang impormasyon. Matagbawon ang madimdim mong himaya. Suwerte mong adlaw ang Martes ug palaran mong numero ang 4, 5, 6.

CANCER (Hunyo 22 – Hulyo 22) – Dangpan ka sa nagkalisod-lisod mong kabanay. Makahunahuna ka sa pagbalhin og trabaho. Malikayan mo ang kabilinggan. Di ka na makighugoy sa mga balhiboog dila. Magpadayon ka pagsilbi sa simbahan. Exciting ang imong sex life. Lunes ang suwerte mong adlaw ug 2, 6, 8 ang palaran mong numero.

LEO (Hulyo 23 – Agosto 23) – Niining semanaha maatubang mo na ang nahikling mong trabaho. Gikinahanglan nga mag-eksersays ka. Magmatngon ka sa imong panglawas. Mosuportar ka sa kampanya alang sa katunhayan sa kalinaw. Dalitan mog maaghatong halok ang imong minahal. Suwerte mong adlaw ang Domingo ug palaran mong numero ang 3, 5, 7.

VIRGO (Agosto 24 – Septiyembre 23) – Motambong kag seminar nga pasiugdahan sa giapilan mong asosasyon. Han-okan ka sa daghang trabaho. Hatagan mog prayoridad ang imong pagtuon. Andam ka na sa pag-abli sa klase. Molahutay ka bisan malisod ang ihatag nga pagsulay. Sabado ang suwerte mong adlaw ug 4, 8, 6 ang palaran mong numero.

LIBRA (Septiyembre 24 – Oktubre 23) – Niining semanaha makit-an mo ang nawala mong gamit. Gikinahanglan nga biyaan mo na ang pagpanigarilyo. Sundon mo ang tambag sa doktor sa di pa ulahi ang tanan. Mokonsulta ka sa imong amahan sa gihimo mong plano. Kusog ang imong sex appeal. Suwerte mong adlaw ang Huybes ug palaran mong numero ang 5, 7, ug 9.

SCORPIO (Oktubre 24 – Nobiyembre 22) – Makapahimuot ang masayran mong balita. Masulbad mo na ang kabangian sulod sa panimalay. Molikay ka sa di ka pa mahisugamak sa kaalaotan. Dako ang tsansa nga mabag-o ang imong kinabuhi. Paundayonan mo ang pamarayeg sa imong minahal. Biyernes ang suwerte mong adlaw ug 6, 2, 4 ang palaran mong numero.

SAGITTARIUS (Nobiyembre 23 – Disyembre 21) – Niining semanaha daghang naghulat sa imong pagpauli. Mahinamon kang makighimamat sa imong kadugo. Ihat-ad mo ang mga programa nga makatabang sa kalisod. Duyogan ka sa maayong kahigayonan. Magmalinawon ka bisan may kaguliyang. Suwerte mong adlaw ang Sabado ug palaran mong numero ang 8, 3, 7.

CAPRICORN (Disyembre 22 – Enero 21) – Mahimuot kang magsud-ong sa nagkapuliki mong mga anak alang sa pagsugod sa klase. Ihatag mo ang gikinahanglang suporta. Mabawi ra ang imong naalkanse. Mobangon ka bisan sa mga pagsulay. Matagbawon ang dalit sa romansa. Miyerkoles ang suwerte mong adlaw ug 9, 6, 4 ang palaran mong numero.

AQUARIUS (Enero 22 – Pebrero 19) – Niining semanaha madawat mo na ang insentibo. Madasig ka sa himoon mong pag-research. Makakuha kag maayong materyal sa gitutokang feasibility study. Makigkita ka sa imong kanhing professor. Mouyon kas hangyo sa imong minahal. Suwerte mong adlaw ang Sabado ug palaran mong numero ang 2, 5, ug 7.

PISCES (Pebrero 20 – Marso 20) – Modatom ang gitambag sa imong mga ginikanan. Palabihon mo na ang imong pamilya kaysa barkada. Mamalit ka nag mga libro alang sa imong tun-anan. Sundon mo na ang gihimo mong time schedule. Magdaginot ka aron makapadayon sa pag-eskuyla. Domingo ang suwerte mong adlaw ug 8, 1, 3 ang palaran mong numero.

ARIES (Marso 21 – Abril 20) – Niining semanaha matapos na ang giatubang mong trabaho. Mopatigbabaw ang imong kait-on. Dako ang kahigayonan nga makab-ot ang imong gipangandoy. Modalikyat ka pagduaw sa imong mga ginikanan. Makigtagay ka sa saro sa himaya sa imong minahal. Suwerte mong adlaw ang Lunes ug palaran mong numero ang 4, 7, 2.