• Ika-3ng Pinasidunggan, Gawad Komisyon ’06 Tigi sa Balak sa Binisaya-Sinugboanon
• Mga maghuhukom: Dr. Jaime An Lim, tagsiya; Atty. Junne Cañizares, sakop; Eleazar T. Acampado, sakop.

 

 

 

Lahugay Sa Mga Balak*

 

Ingon ana gyod nang tindera… esmayling!

 

Sulod sa pasaheroang

Bangka, Vaniza Uno

Sa Getafe midunggo, nag-utaw-utaw

Sayo sa buntag sa Domingo

 

Unsay imo, Day?

Naay kendi, Day!

Dong, palit imong itlog

 

Saba si Lagring

Nagpahimutang sa mga baligyang

Nagkalidades

sa nigong hinanipan

 

Maxx, puso, itlog

Sangpit sab ni Tiya

Mani, Day, Rin-bee

Tubig-mineral, way ice

Maong way bugnaw lagi

 

Nahalinan si Lagring

Gatingsi, gayawyaw

Saba, makaahat kag

Palit sa iyang pusong bugnaw

 

Kang Lagring pa

Mamaligya na lang

Kuno siya

Kay kulatahon

Siya sa iyang bana

 

Sulti pod ni Tiya

Palit na lang

Kuno siya og

Usa ka long neck

Ug duha ka litro

Tambal sa sakit sa ulo

 

Unsaon man

aron mahalinan

Ingon ana gyod

tindera…

Esmayling na lang.

 

 

 

Damgo

 

Anaa ra kana kanimo

Kon imong tuohan

O palabyon lamang

 

Unsay buot

Ipasabot sa tubig

Kayo ug mamala?

Balay, halas o

Kasal ba kaha?

 

Sa banang dili

Makita ang nawong

Sanglit, angay bang

Sundan, sabton?

 

Pananglit mahitabo

Angay bang tuohan

Kay alang kanako

Kining mga damgo

makab-ot lamang

Kon pagahagoan.

 

 

 

Suwayi

 

Suwayi

Katkata ang kinatas-ang bungtod

Ug pag-abot didto

Sud-ong

tutok sa wanang

Haaaawan, laaaaaawom

Ipasagpa sa hangin

Ang imong aping!

 

Suwayi

Lutasa na kanang

Dughang naghandom

Haplasi og duga sa sili

Haaaaang, ssss’kit

Hhhhaaapdosshh, iiiniiit

hangtod nga ang kasakit

di na mabalikan

Makalimtan na ang tanan

 

Suwayi

Tilawi ang katam-is sa latik

bisan sa makausa lang!

Gikan ka sa lima ka tuig

Nga pagpuasa

Sa tam-is nga matang.

 

Suwayi

Ilabay, ihapak

Sa bungbong

Ang plato

Baso

Mangagupok kining tanan

Alang kana sa mga kulata

Nga imong nahiagoman

 

Hiiilak, tiyaaaabaw

Danguyngoy, agunto

Alang sa nakab-ot nga kinabuhing

Sa pagpagawas

Giutngan mo

 

Suwayi

Siyagiiitt, siyagiti ko!

Pamuyboy

Pesteng giahak

Latigoha kos balikas

Nganong dili?

Hilas? Hilas?

 

Ayaw na!

Ayaw na paghunahuna sa umaabot

Buhi na

Buhi sa pisi sa kabalaka

Mahagbong kang magpiyong

Malinawon

 

Suwayi.

 

Suwayi!

 

Su. Wa. Yi.

 

 

 

Pungpong sa mga buwak

 

Misaad ka ug nanumpa

Miluhod pa man gani

Saksi ang mga bituon

sa langit

 

Ug ang hangin

nga nagpalibot kanatong duha

naghatag kanimo og igong kusog

nga moingon kini dawata

 

Gidaitlan mo ako sa mga

Buhilamang kinusi

Gikan sa diing tanaman

Apan wala nay midulot

Ni mipukaw sa akong balatian

 

Tingkad man

Ang mga bulok ning mga bulak

Dili na gayod mabalik ang kagahapon

 

Kay lunhaw na man ang

Pagbati kong napunggak

Ug naharos na sa hangin

Ang atong panag-uyon

 

 

 

Tahom sa kabuntagon

 

Unsang matanga sa linalang

Ang nahipalgan

Dali rang midulot

Sa akong kasingkasing

Sa akong panumdoman

 

Maanindot himamaton

Bisan sa mga matang mapul-anon

Kining linalang

Nga sa kanunay pagalantawon

 

Way sama, way laing

Tiunay nga pangandoy

Ang paghandom sa

Imong katahom

 

Busa tugoti kining

Pagbati nga midung-aw

Gikan sa mga bentana

sa kinaadman

 

Nga bisan sa halayo ra gayod

Makaaninaw

imong hulagway nga mipakli sa

bidlisiw sa Adlaw

 

 

 

Manikyur

 

Luspad ang mga kuko

Ug akong mga tudlo

Dili mahimutang ang

Akong hunahuna

 

Nangutingkay sa kasuok-suokan

Sa puno kong bag

Nakaplagan ang manikyur

pula, tingkad

 

giuyog ko ug gihapak-hapak

sa akong palad

ang bolitas sa botelya

milagtik

sa manikyur mikutaw

 

Gibantayan ug gitutokan ang

Pagpahid sa luspad kong kuko

Karong gipaguwapa

Kinahanglang mahimutang

Dili kurog ang kamot

 

Hapsayon gyod kini

Aron kon manglakaw kita

Sa puting balas sa Boracay

Makamatngon ka sa kapuwa

Sa akong mga tudlo

 

Ug, mahinumdom ka

Sa akong ngabil

Nga gidamgo kong

Hagkan mo

 

 

 

Kabayo-kabayo

 

Nagpautaw-utaw

Lamang siya sa katin-aw

Sa kadagatan

Nagduyan-duyan

 

Sa berdeng mga lusay

Enhalus kadto

Kon diin siya mitambid

Milikos sa iyang bukogong ikog

 

Samtang iyang gipaminaw

Ang gabudlot niyang

Sabakan, nanghinaot

Nga sa kagabhion

Ilawom sa aninag sa Buwan

 

Walay makatugaw

Sa paghinanok

Sa iyang semilya

Halayo pa ra ba

Ang kabuntagon

 

Basin unya ang hayag

Sa mga subiran

Mosakdap ug molaknit

Sa pilay pa’d nga

Mamahimong amahan.

 

 

 

Su’d sa kuwarto sa usa ka Hotel

 

Uyon ko kang Moby

Nganong gihinganlan niya

Ang iyang album

HOTEL

Makalingaw kunong hunahunaon

 

Matod pa niya

kining mga kuwarto luna

bilanggoang pribado

Gilabay-labayan ni bisan kinsa

Baynte kuwatro oras gihimong

espasyong way nanag-iya

way timailhan

 

Su’d niining mga kuwartoha

Adunay mohilak, matulog,

Maligo, makighilawas

Dinhi mamugna ang mga relasyon

Ug dinhi usab kini mapapas

 

kon mo-check-in na gani kita

Kining kuwarto mamahimong

sa makadiyot

Atong kinaadmang luna

Unya dayon

kita mobiya

 

Sama ra sa kalibotan

Paphaan, silhigan

Trapohan susama sa kuwarto sa

HOTEL

Lumalabay ang tanan

 

Sakto nga pasumbingay

Mao nga ako karon

Samtang nagpatugtog kang Moby

Nagtighaya sa kuwarto

Naghandom na lamang

“Nagpaabot kang Godot”

 

 

Pungpong sa mga Balak

Ni ANGELIE C. NELLAS