Makapahingangha nga estorya: Angels & Demons ug The Da Vinci Code ni Dan Brown

Ni MERRIAN PIQUERO SOLIVA

DILI ko moingon nga himasa kaayo og libro apan mobasa lang ko sa mga libro nga diin makahatag kanako og kahinam ug kanang dili ko makapugong nga mobasa gayod. Tungod seguro sa kamahal na sa libro – dili na sayon pagpangita sa mga estorya nga nindot basahon. Apan kon imong ikonsiderar ang mga “book sale”, adunay mga libro didto nga maayo pa basahon. Bisan tuod og dili na maayo ang hapin apan aduna pa gihapon kitay makita nga maanindot pa gihapon susama sa bag-ong mga inimprenta.

Usa ka adlaw, sa dihang miuli ang akong bana gikan sa trabaho, akong nakita nga ang iyang cargo pants gaburot. Ako siyang gipangutana kon unsa ni. Abi nakog ang iyang inilisan nga T-shirt nga maoy iyang ginahimo… apan, mitubag siya gilayon: Secret! Naintriga ko sa iyang tubag busa ako siyang gipunayag pangutana.

Nahimong duwa namong duha nga diin ako ang motagna ug siya ang motubag. Sa kadaghan sa akong gitagna, mora na ko og gikapoy. Naluoy na seguro siya… busa iya na lang gitug-an nako. Usa diay ka libro ni Dan Brown nga ang ulohan “Angels and Demons”, dili ba makaintriga? Ang ánghel ug ang demonyo?

Busa akong gibasa ang hamubo nga bahin niini sa luyo nga panid sa libro ug dinhi akong namatyagan kon unsa kining klaseha nga libro. Nahuman na diay og basa ang akong bana busa iya kining gihatag nako aron ako na usab ang mobasa niini.

Sa sinugdanan, si Dan Brown mipahayag nga ang tanan niyang gisulat kabahin sa illuminati tinuod. Kon tan-awon nimo sa Internet, makakita ka og gagmayng sites mahitungod sa konspirasiya sa gobyerno nga gisulat sa batan-ong mga lalaki nga diin aduna silay pagtuo nga kawatan lang ni Bill Gates ang ilang mga kabibalo. Sa “Angels and Demons”, lahi kaayo, tungod kay makalingaw man kaayo ang estorya.

Ang illuminati, matod pa sa estorya, usa ka grupo sa bantogan nga mga scientist ug philospher sa panahon ni Galileo diin ang Simbahang Katoliko galimod sa siyensiya kay ang ulahi milimod man sa Diyos.

Gatosan ka tuig ang minglabay, ang professor sa religious iconology sa Harvard nga mao si Robert Langdon gihangyo nga moimbestigar kon usa ba ka simbolo sa illuminati ang gipatik sa dughan sa usa ka patay nga scientist.

Ang unang butang nga nakapahigugma nako niini nga libro mao ang kapuno o kadasok niini sa tinuod nga impormasyon. Gawas sa illuminati, adunay kasayoran mahitungod sa kinadak-ang scientific research center sa kalibotan nga mao ang CERN, mga antimatter particle, ug ang pamaagi sa Vatican sa pagpili sa ilang Santo Papa. Makapangangha gayod… Ug gusto nako kining kompirmahon sa ginagmay nga mga impormasyon sa mga sinulat ni Dan Brown. Sa libro, ang director sa CERN mihimo sa usa ka komento nga sila ang migama sa World-wide-web.

Ang sunod nga parte sa libro nga diin lami kaayo pagahisgotan mao ang debate tali sa science vs. religión.

Adunay mga tawo nga minghangyo nga gakinahanglan sila sa science kaysa makabuta nga pagtuo sa Ginoo. Aduna usay mga tawo nga ming-ingon nga ang science usa lang ka sulti-sulti og unsa ang atong gituohan; sa uban, ang science usa lang ka kamatuoran sa Ginoo ug ang iyang milagro. Ang labing hinam nga parte sa libro mao ang pagpakita sa magsusulat (Dan Brown) isip usa ka sumusunod ni Satanas kun devil’s advocate diin wala siyay kaugalingong opinyon nga iyang gipaduso.

Ug ang kataposan nakong naganahan nga gusto usab nakong ipaabot kaninyo mao ang makalingaw nga paglubag-lubag sa estorya. Aduna koy mga pangagpas kon unsa ang mamahimong hitabo apan wala akoy eksakto nga nakit-an. Ang mga tawo sa relihiyon makadani ug makapahigugma kabahin sa panginahanglan sa milagro diin dako nakong kadismaya kay adunay higayon sa libro nga wala mahitabo ang milagro.

Pagkahuman nako og basa panid sa panid, mibati ko og dakong kahinam diin gusto ko nga molaktod paghuman. Niini, akong gipangutana ang akong bana kon unsa man gayod ang unod sa libro. Iya lang kong gikataw-an ug gilayon iya kong gihagit kon pipila pa man diay ka adlaw nga ako magbasa niini. Kay siya mihinambog man pag-ingon nga nahuman niya sulod sa duha ka adlaw lang.

Pastilan! Nahagit ko. Busa akong gigahin ang tibuok nakong semana aron lang nako mahuman pagbasa ang libro.

Tungod sa positibo nga lakaw ug tubag sa “Angels and Demons” nga libro, ang publikador niini mipagula na usab og usa ka libro ni Dan Brown nga giulohan og “The Da Vinci Code” diin kini naghatag na usab kanamo og kahinam. Sa walay pagduhaduha, mingpalit gyod mi og kopya. Ug sama sa gihapon, ang akong bana maoy miuna og basa.

Mangutana ko niya panalagsa kon kinsa man ang love interest ni Robert Langdon. Kon si Vittoria Vettra ba gihapon diin makita nato ang ilang kapareson. Mitubag ang akong bana nga dili na si Vittoria ang iyang pares kondi adunay bag-o ug guwapa nga babaye nga mao si Sophie Noveu. Ug midugang pa siya pag-ingon… “makaintriga kaayo ang tuis sa estorya. Maayo na lang nga nakabasa ta og una sa Angels and Demons”.

Morag dili na ko makahulat pa. Misaka na usab ang akong pagka kuryoso. Gusto kong magkuha og laing kopya sa libro. Apan sa kamahal, akong giam-aman ang akong kaugalingon nga maghulat.

Sa akong hunahuna, mora man og wala molihok ang adlaw. Gasige kog ihap niini kay gusto na ko mobasa. Misaad ang akong bana nga makabasa na ko sa Sabado. Pag-abot sa maong adlaw, mahinamon kaayo ko nga mipakli sa mga panid niini. Ug dinhi, akong nabasa ang unang bahin nga tinuod diay gayod nga dugang makaintriga.

Usahay mohatag og ideya ang akong bana mahitungod sa libro apan kusganon akong mopakgang kaniya – nga dili magsaba (lahi sa una nga ako ang gusto nga magpaestorya kaniya) tungod kay gusto man kong ako mismo ang mohikap sa tibuok estorya.

Si Dan Brown, ang magsusulat, usa ka ngalan nga dili gayod nato malimtan. Iyang gibarogan ang iyang estilo sa pagsulat diin ang magbabasa mahinamon kaayong mopakli kada pahina. Ang iyang gigamit sama gihapon sa “Angels and Demons” nga diin iyang gipunting pagka blockbuster perfection.

Sa unang libro nga akong nabasa, si Robert Langdon gipaila isip usa ka propesor sa Harvard diin nagamaster kini sa art history and religious symbology nga, sama sa giingon sa iyang kaubang mga babaye, aduna siyay puno kaayong edukasyon bisan postura pa lang ang tan-awon. Dili ikalimod. Ang bag-ong libro mipakita kon sa unsa na usab nato higugmaon si Robert Langdon nga nagsubay sa antimatter, big-bang theory, the cult of illiminati ug ang paghadlok sa Vatican ug sa uban pang mga butang. Kining tanan usa lang ka gitawag nato og warm up para sa makabuyong nga estorya sa “The Da Vinci Code”.

Ikonsiderar ang bag-ong pasiuna sa libro nga didto gibase sa Grand Gallery of the Louvre. Kini ang klase sa libro nga mipakita nga ang gitas-on sa gallery tulo ka pilo komparar sa Washington Monument. Gisagolan pa gayod niya og usa ka Caravaggio, an albino monk and curator, nga nakigbugno sa kamatayon. Kini nga mga talan-awon naghatag kanato nga si Dan Brown makamao mopaigmat sa interes, sama sa curator nga si Jacques Saunière, nga nakigbugno usab alang sa iyang kinabuhi.

Pagpaningkamot sa painting aron moandar ang alarm system sa museum. Si Saunière milampos sa paggahin og daghang oras. Iyang nagamit ang ubang mga kinawat nga panahon – diin sa kataposan – iyang gihubo ang iyang sapot ug mihimo og usa ka lingin ug gipahiluna niya ang iyang kaugalingon sama sa pigura sa dibuho ni Leonardo da Vinci nga inila sa tibuok kalibotan nga mao ang The Vitruvian Man. Ug ang pagbiya og usa ka anagram ug Fibonacci’s famous numerical series isip timailhan para sa mamahimong tubag sa iyang misteryosong kamatayon.

Unsa man kining tanan, dili kini igo sa pagpaadto ni Langdon, nga sa pagkakaron dili niya mapugngan ang pagkaluspad sa kahikurat diin gi-describe siya sa usa ka artikulo sa magazine isip usa ka “Harrison Ford in Harris tweed.” Ang labing ulahing sinulat ni Langdon, nagpaduso og usa ka dili orihinal nga pagtan-aw sa nahimo nang religious iconography diin mitataw kini sa usa ka kontrobersiya.

Makita usab niini ang pag-apil sa usa ka cryptologist sa pagka tawo ni Sophie Noveu. Usa ka simple nga babaye nga adunay misteryo nga lahi sa mga babaye sa Harvard nga makita gilayon ang kaanyag sa hitsura ug porma niini. Bisan tuod og wala pa ipakita kon unsa ang mamahimo nilang panag-uban apan makita gayod nga adunay posibleng moturok nga gugma taliwala nila ni Robert Langdon.

Kauban ni Leonardo isip usa ka partner sa krimen, tungod kay ang iyang kinabuhi gilibotan man sa sekreto ug simbolo. Si Ginong Brown makita nga walay pili sa mga nasyonalidad. Puyde ninyo i-google: kon gusto ninyong susihon ang giimbestigar nila ni Langdon ug Agent Noveu. Makita nimo kon unsa kini kapuno sa religious conspiracy theory. Ang Priory of Sion, The Knights Templar ug ang labing kontrobersiyal nga Vatican Prelature nga gitawag og Opus Dei gipakita dinhi. Ang Divine Proportion ug ang lahi nga sex rites nga makit-an sa pelikula nga “Eyes Wide Shut” ug ang “Holy Grail”. Kon ang imong pagtuo sa “Holy Grail” usa ka baso, si Dan Brown mitataw – ug mipresentar sa lahi nga kontrobersiya sa Grail nga nahitabo panahon pa sa 19th century ni Jacques Saunière ug mao usab kini ang nakahimong kontrobersiyal sa bersiyon sa sine – nga gipugngan sa simbahan ug sa uban pang mga grupo.

Sa iyang “Angels and Demons”, ang magsusulat mipakita sa duha ka lugar diin ang nakitang ebidensiya ug ang pagtuo sa relihiyon nagkabangi. Iyang gihimo ang usa ka mabugnaw nga pagsubay niining maong teritoryo, diin ang pamaagi usa ka pagbiaybiay, apan nagpunting kini sa usa ka hagit sa mga polisiya sa Vatican. Si Sophie ug Langdon misubay sa mga butang nga maoy mosugid sa misteryo nga gitanom ni Leonardo, ug dinhi miabot kini sa makapanganghang teyoriya diin maoy magdala kanato ngadto sa “The Da Vinci Code” nga morag halos makapahidangat kanato sa kinatumyan sa kahinam. Apan sa kataposan, madala kita sa mga pangutana diin giitsa kanato ni Ginong Langdon.

Ang libro usa gayod ka makapabali-sa-liog nga gikusgon, diin ang magsusulat (Dan Brown), sa labihan kaayo kamahinamong paagi, modala kanato ngadto sa usa ka sitwasyon nga morag apil kita sa estorya. Sa laing pagkasulti, ang kada panid sa libro magdala kanato ngadto sa bung-aw; nga dili sayon agion, kon atong ikonsiderar ang gidaghanon sa mga simple nga karaang pinulongan nga mahuman gilayon. Si Sophie ug Langdon gidala ngadto sa usa ka dakong lumba, nga maoy magdala sa usa ka sitwasyon diin ang magbabasa adunay dakong kahinam nga pagabation. Alang sa ilang kabatid, ilang malikayan ang mga tawong minggukod kanila sa walay pagduhaduha.

Sa dihang gisunod sila sa usa ka modernong ekipo nga gitawag sa English og global positioning system, sama pananglit sa pagpadala sa sensor ngadto sa kuwarenta ka tiil nga bentana aron mailad ang mga nanaggukod kanila – usa kini ka smart nga pamaagi. Miresulta kinig mga komento sama pananglit sa: nahibalo ka ba kon pila ka buok ang laki nga buyog sa usa ka balay? – niining puntoha ba, mahibaloan ba nimo kon pila ka buok kini sila niining kalibotan?

Ang “The Da Vinci Code” usa ka estorya diin malingaw ka ug maapil ka sa usa ka makapabugto-sa-ginhawa nga mga panghitabo. Diin ang mga tawo nga anaa niini, adunay tagsa-tagsa ka estorya nga gisubay. Niining puntoha, si Ginong Langdon gipangutana sa iyang giabotan kon aduna ba siyay gitagoan nga bahandi nga gusto niyang tabonan. Sa tinud-anay, ang gitagoan ni Langdon mao ang iyang kamaayo mosulat diin nagadepende kini kon unsa ikaw motubay ug mosubay niini nga makapagawas gayod sa abog sa imong bangko sa kahinam.

Sa makapahinam nga kaagi nga akong nasinati sa pagbasa nako sa duha ka nobela ni Dan Brown, dili na ko makahulat pa sa pagpalit sa lain na usab niyang mga sinulat.

Alang kaninyong mga wala pa kabasa – hala, sugdi na ni ninyo ug ikaw na mismo ang moingon diri nako ug mismo sa imong kaugalingon nga tinuod gyod diay nga maayo ug kuyaw si Dan Brown modala sa iyang panulat… makapangangha gyod diay tinuod. Ug busa, dali… apil sa kalingaw sa usa ka roller-coaster twists.—