Ang Dalaygong Misyon sa SWU Medical Alumni Association, USA

Ni MARIANO V. TUYOR

SINUGNIBAN sa pinunpon nga kadasig, natukod kining kapunongan sa mga doktor nga nagtapos sa Southwestern University nga atua na mangalagad karon sa Amerika. Naghugpong sila aron hiniusang ipatigbabaw ang kainit sa malumong kasingkasing alang sa paghatag og serbisyo sa kadugo nga Pilipinhon. Kini gipamatuod sa batid ug hanas nga mga Bisayang doktor nga atua na magpraktis sa ilang propesyon sa Amerika apan wa gihapon ihikaw ang ilang pagtabang sa kaigsoonang ania sa atong yutang natawhan labi na kadtong nag-ilaid sa kalisod.

Dako ang ilang gikatabang sa pagpasiugdag programang scholarship alang sa kabos mga nga estudyanteng di makasugakod paggasto sa pagkuhag kursong medisina.

Laing usa sa dagkong mga proyektong gilusad sa asosasyon mao ang medical-surgical mission. Kining libreng serbisyong medikal nga gihatag ngadto sa kaigsoonang Bisaya labi na gayod niadtong di makaabot sa pagpatambal sa ilang balatian, maoy tawhanon (humanitarian) nga kaakohan nga wa nila idinawo.

Gawas sa scholarship ug medical-surgical mission, mihatag usab ang asosasyon og dakong donasyon ug suporta alang sa konstruksiyon sa Sacred Heart Charity Hospital sa Southwestern University, Cebu City. Dalaygong buhat kining ilang gipakitang pakigtambayayong alang sa kaugmaran sa natad sa medisina.

Gipanday usab ning maong asosasyon ang malig-ong panaghiusa pinaagi sa pagtinabangay sa usag usa. Gilatid ug gihingusgan sa SWU Alumni Association, USA ang pagtabang ngadto sa nangita pag trabaho labi na kadtong bag-ohay pa lang miabot sa Amerika nga mga gradwado sa Southwestern University.

Nagkahiusa ang mga membro panahon sa kalipay ug kasub-anan. Gikongkretog maayo ang kalig-on sa ilang panaghiusa pinaagi sa pagsaulog sa tinuig nga reyunyon, pagpahigayon og kombensiyon, pagdasig ug pagpahalipay sa kaubanan nga nanagpakadawat og awards, honors ug promotions, pagpahayag og pahinungod sa mga nagsaulog og birtdey, kasal ug anibersaryo.

Gipahigayon ang masayon nga komunikasyon sa matag membro pinaagi sa networking sa telepono o computer internet via e-mail.

Ang Southwestern University Alumni Association, USA nakigtambayayong usab sa laing dakong kapunongan, ang Bisaya Medical Association, nga gihugpong sa tanang mga Bisayang doktor nga atua na sa Amerika. Unang presidente ning maong asosasyon mao si Dr. Alfonso Dampog nga gisundan ni Dr. Procopio Yanong. Dayon nasundan pa sa laing nangalagad nga sila si Dr. Ramon Suarez, Dr. Cesar Puray, Dr. Sergio Villa, Dr. Valeriano Gabisan, Dr. Dick Larumbe, Dr. Erico Deiparine, Dr. Dominador Dayon, Jr., Dr. Lilah Gonzales, Dr. Leonardo Malalis, ug Dr. Juvenal T. Jabel.

Ang bag-ong hut-ong karon sa mga opisyal sa SWU Medical Association, USA, mao kining mga mosunod: Dr. Mel M. Allego, presidente; Dr. Nenita L. Suarez, Dr. May M. Tabanera, Dr. Urias A. Almagro, Dr. Gilde Alidon ug Dr. Leo Gangoy, mga bise presidente; Dr. Flora A. Interone, secretary-treasurer; Dr. Arturo J. Pamaong, PRO; Dr. Urias A. Almagro, Dr. Juvenal T. Jabel ug Dr. Leonardo C. Malalis, special counsels to the president; Dr. Ben P. Mosquera, executive director.

Sila usab si Dr. Lorenz Alaan, Dr. Felocelia D. Alcid, Dr. Alejandro Alino, Dr. Nenita Prieto Basa, Dr. Paul Beltran, Jr., Dr. Halbert Capuy, Dr. Dominador Dayon, Jr., Dr. Erico Deiparine, Dr. Valeriano Gabisan, Dr. Prospero Gogo, Dr. Lilah Gonzales, Dr. Alberto Jayme, Dr. Dick Larumbe, Dr. Lapulapu Llanos, Dr. Aida Banque Narvios, Dr. Albert Orquiola, Dr. Geraldine Ang-Rabanes, Dr. Ramon Suarez, Dr. Alfredo Velasquez ug Dr. Procopio Yanong, maoy naglangkob sa Board of Director. Honorary member usab si Dr. Julian Divinagracia; si Dr. Juvenal T. Jabel isip immediate president, samtang si Dr. Mel M. Allego, gawas sa pagka pamuno, siya usab ang editor sa The Pulse.

Ang kalamposan sa gipahigayong mga aktibidad ug okasyon, makasaysayanong ipatik sa The Pulse, ang newsletter sa asosasyon. Dinhi ning maong newsletter matamdan ug masud-ong ang mabulokon ug halandomong mga larawan. Dugang nakapadasig-hinam ining basahona mao ang madula-dulaong estilo sa pag-caption ug ang piniling piyesa sa mga balak hinungdan nga nakaangkon na kinig luna sa kasingkasing sa matag membro sa asosasyon ug ngadto sa mga binuhat nga nakahupot niini.

Taas-taas na ang kutay sa katuigan sa pagtunhay sa SWU Medical Association, USA. Ug bulahan ang mga benepisyaryo sa mga proyekto ug programa nga gipasiugdahan niini. Talagsaon ang ilang mga dughan. Gawas nga nanumpa ang mga membrong doktor sa pagtuman sa ilang propesyon sa pagluwas sa mga may balatian, nangako pa gayod sila sa usa ka dalaygong misyon diha sa paghatag og katilingbanong serbisyo.

Seguradong molipang ug magmabungahon ang binhi nga ilang gitisok sa matag kasingkasing sa mga binuhat nga ilang gitabangan. Angay silang ipasigarbo. Dawata ang among pahalipay.

Mosanay unta ang inyong mga kaliwat!— (Bismag 01-03-07)